Gouel Hanter Eost e Breizh, Lughnasad e bro Iwerzhon, a sinifi bodadeg Lugh (1). Lugh oa anv un doue, boutin d'ar broioù keltiek. Ijiner an arzhoù, diwaller an hentoù hag ar beajourien, mestr ar c'henwerzh hag ar marc'hajoù...Kavet e vez roudoù deus e anv e meur a gêr Europa, vel Lyon : " Lugdunum ", kreñvlec'h Lugh; ur Gouel braz 'vize eno, d'ar c'hentañ a viz eost, da vare ar Romaned (le Concile des Gaules). En henamzer, ba' Iwerzhon, vize bodadegoù braz, gant redadegoù kezeg, c'hoarioù dre nerzh pe dre ampartiz. Seurt foarioù 'veze ivez troet d'ar c'honvers. Ouzhpenn-se vize divizoù ha tabutoù war ar bolitikerezh pe ar justis...(2).

Gant sikour an doueez
An doue Lugh en dije bet krouet ar gouel-se‚'vit enoriñ e vamm magerez Tailtiu," Hini Vras an Douar ". An doueez-se noa goulennet digantañ, pa vije maro, aozañ c'hoarioù kañv d'he enoriñ e penn kentañ miz Eost, da gaout ed fonnus. Ne oa ket tu da gaout ed druz hep skoazell an doueez. Roueoù bro Iwerzhon teue o c'halloud de' n'er zimeziñ en ur stumm arouezus, gant an doueez, 'dei ar galloud brasañ. Evel-se Gouel Hanter Eost oa ar poent kreñvañ deus an emgleo talvoudus, 'tre ar roue, an doueez, an douar, ar boblans hag an Natur.