‘Vel ‘ba Dunkerque, Ened Douarnenez zo stag mat deus bed ar besketourien. Kaoz zo deus Ened Douarnenez evit ar wech kentañ ‘ba skridoù an ti-kêr e 1835 met kalz koshoc’h eo evit se, sur a-walc’h. Ar pesketa war ar sardin ‘noa degaset pinvidigezh ha tud ‘ba bro Douarnenez e-kreiz an triwec’hvet kantved. Da vare Meurlarjez n’eo ket krog c’hoazh koulz ar pesketa hag ar besketourien a ya niverus da gemer perzh er fest a-raok mont war vor. Profitañ a reont deus ar mareoù diwezhañ evit KAS NEÏ a-raok stagañ e-pad mizioù gant o labour start. An dud a wisk dilhadoù kozh, kozhajoù chomet da LOUEDIÑ er solieroù. Evel ‘ba Dunkerque, ar giz zo gant ar baotred gwiskañ dilhadoù merc’hed, dreist-holl gwiskamantoù bro, koefoù hag all, pe c’hoazh gwiskamantoù labour micherourezed ar friturioù.

Ur sizhunvezh fest

Kroget ‘vez ganti d’ar Sadorn a-raok Meurlarjez, gant lakaat an Den Paolig da roue an Ened. An Den Paolig zo graet gant paper stoup, hag unan nevez vez graet bep bloaz. Deus an noz zo ur bal bras ‘ba sal ar gouelioù. D’ar Sul vintin ‘vez lidet un dimeziñ un tammig ispisial kar ar plac’h nevez n’eo ket ur plac’h e gwirionez, ur paotr ne lâran ket ! Ur sae wenn zo gantañ hag e bried zo ur gwir gwaz anezhañ, sañset. Goude-se ‘vez roet lañs d’an dibunadeg vras, gant fañfarioù, MAJOREZIGED, strolladoù tud treuzwisket ha kirri bet KINKLET diouzh un tem bennak. Meurlarjez eo an devezh birvidikañ, gant tud e-leizh er straedoù hag en tavarnioù, o kanañ kanaouennoù martolod. An tavarnioù a chom digor a-hed an noz pe dost. Baloù gwisket a zo ivez, gant ur c’hoñkour evit dibab ar gwiskamant gwellañ. Da Verc’her al Ludu ‘vez devet an Den Paolig KEMENT HA DISKOUEZ eo echu gant Meurlarjez, betek ar bloaz war-lerc’h. Ened Douarnenez ne bad ket ken pell ha hini Dunkerque met ken plijus int an eil hag egile, hep mar ebet.