Anjela Duval  
Barzhoneg eus Bro-Bers

Barzhoneg eus Bro-Bers

 

Atravet noz ha deiz da brederiañ war va flanedenn

N’ouzon a-belec’h e teuan, na da belec’h ez an.

Evit perak va Bezout ? Evit petore harlu ?

Met nann, me ’oar, eus krec’h on deut

Ha di e tlean distreiñ.

Me zo Eostig ar Baradoz, er gaoued evit un nebeud deizoù

Levenez ! Dont a ray an Deiz ma nijin da ga’t va muiañ-karet

Va divaskell a skoio war e zor !

Met piv an Hini-se am selaou hag a gomz

War un dro gant va alan ?

Piv eo Hennezh hag a sell ouzhin gant va daoulagad

Hag eo E Vuhez va Buhez ?

Te eo, Aotrou. Va Ene zo Te.

Te zo aze, da gaout a ran.

Ehan ebet mui evidon. Va mouezh n’hello mui tevel

Blein ac’hanon. Diskouez din an Hent d’ez Ti.

C’hoant am eus tañva blaz mezvus an Unvaniezh.

Ma teufe dit en difenn ouzhin. Me ’dorrfe pep tra.

Va Fedenn n’eo ket ur Bedenn, Aotrou.

Ma ne wel ket va Ene ac’hanout tal-ouzh-tal

Pa dasson ar galv, ma pedan troet war-zu ar santual

Eo war-zu dit da-unan

Evit da Gened-te da-unan

Pediñ ’ran, gant jestroù aner. Komzoù ven

Pedenn ur pilpouz, dilusk hag unton

Mezh am eus eus va Fedenn

Aotrou mezh am eus.

Ne gredan mui sevel va daoulagad warnout.

A-benn kredout pediñ, ’vefe ret bezañ un ael

Met me zo en Harlu, diskaret ha saotret

Peoc’h eta. Peoc’h d’am Fedenn

Aotrou, ne c’hell ket da dizhout

Hogen pediñ ’ran. Va dlead eo, rak m’eo ret din lavarout

Tourmant va c’halon, p’en deus diouer ouzhit

Aotrou e selloù a druez

Truez evidon

Sell ouzhin.

 

[Genver 1969] Diwar Roumi.

 

"Pierre Dubourg evit e film diwar-benn ""Les mystères de la terre"" (1976)"
 
Degemer |  Troidigezhioù |  Anjela Duval hiziv
  © Anjela Duval - Pep gwir miret strizh evit an holl vroioù