Anjela Duval  
Deiz-ha-Bloaz

Deiz-ha-Bloaz

 

Un dro c’hoazh d’an nadoz vihan :

            Warc’hoazh, mar bez ho polontez

Warc’hoazh am bo bet teir gwech ugent vloaz !

            Teir gwech ugent hañv

            Teir gwech ugent goañv

            Teir gwech ugent vloaz !

            Teir gwech fenoz enta

Me ’dlefe kanañ Magnifikat…

O ! Kavet am eus evel pep den

Kavet ’m eus war hent ar vuhez

Drez ha spern ha pri ha mein ruilh

Skorn hag erc’h ha tan ha kurun

Ha poan hag anken ha trubuilh

            Ha dispriz ha dienez

            Ha goap ha kasoni

            Ha kleñved ha kañvoù

Bet am eus naon ha sec’hed

            Bet am eus riv

Gouzañvet em Ene, em Spered, em c’halon

            Hag em c’horf paour ’ta

                        Va Doue !

Kerzhet am eus en deñvalded, en digenvez

            Kerzhet war ribloù an islonk

Ha galvet gant daeroù trema ’n Neñv…

Va c’hroaz ? He douget am eus-hi dereat ?

Siwazh ! Lies am eus he ruzet

He zreiniet, he stlejet d’am heul

            ’Vel ur samm digar…

                                               Lezenn ar vuhez eo :

Stankoc’h ar reuz eget al levenez.

—’Vit un dra hon laouena a zo kant hag hon nec’h —

            Levenez ha dudi ’velkent :

            Levenez ar Frankiz

            Kreiz ar maezioù gouez

            E-touez ar gwez

            Laboused ha bleunioù gouez

                                               Frondoù yac’h

            … Ha loened, loened, loened

            Loened am anav evit o mestr

            Hag am douj, hag am c’har

            Chas karantezus a lenn em daoulagad

            A lip an daeroù war va jod

Loened hag a drid o c’halon c’hlan

            Gant trouz va botoù tachet

            Hag a respont d’am galv

            Pep hini en e yezh.

                        … Dudi ar boazioù kozh

            Ar geveleriezh, ar genskoazell-se

                        Etre tud ar maezioù

            Evel pa vijer holl kerent.

Teir gwech fenoz, o va Doue

Deoc’h Bennozh ha Trugarez

Gant levenez a lavaran

Grit ma kerzhin ar peurrest eus va buhez

                        Gant ar memes hent

            An hini a gas davedoc’h

            Davet ar re zo dija ganeoc’h

            Hag am eus gouelet dezho kement

                        Ha grit o va Doue

            Ma welin va Bro o splannañ

            Dishual ha digabestr

            … Ha dieubet diouzh ar Vezh…

                                   Amen

 

[3 a viz Ebrel 1965]

 

 

Start eo ar foenn da sachañ !
 
Degemer |  Roll ar barzhonegoù |  Anjela Duval hiziv
  © Anjela Duval - Pep gwir miret strizh evit an holl vroioù