Anjela Duval  
1980 Bloavezh ar Glad

1980 Bloavezh ar Glad

 

Bet zo Bloavezh ar Vaouez

Bloavezh ar Bugel

Bloavezh ar Wezenn, ha me ’oar ?

Hiziv a zo kaoz eus Bloavezh ar Glad

— Daoust hag ur ster en deus c’hoazh ar ger ?

Dispennet. Didammet. Saotret ha gwallet

Gant viruzennoù an Araokaat

Gant terzhienn gontammus ar Modernaat

… Glad ar re Vev o treiñ da Sahara

Glad ar re Varv troet e Parking

Douar santel en-dro d’an Iliz-parrez

Ma krede hor re Dremenet

Repoz e Peoc’h betek ar Varn diwezhañ

E Traonienn Jozafat.

Difoñset, divorc’hed gant ar Bulloù-dir.

Barrleun eo ar Skolioù-meur

Ha goullo an Ilizoù

Ar Presbitoeroù en ekan

— Gant o gwerzh ’vo savet salioù-dañs-

Stouvet an hentoù treuz

A gase eus an eil Tiegezh d’egile.

Savet avat otostraedoù

— Na gasont nemet d’an Harlu —

Ar Babigoù er Skolioù-mamm

Ar C’hozhiad en Ospis

Ar Yaouankizoù el Liseoù

Ac’hane d’an Arme. Pe d’ar Polis

Ar c’hontamm kimiek ’n hor Parkeier

Ha bevet ar Mekanikoù !

Hag an Empennoù Elektronek !

Da c’hortoz an Ijinadenn-Veur ?

            An Ene Elektronek !!!

      Hag out anvet Bloavezh ar Glad, 1980 ? —

 

2 a viz Eost 1980

 

"""He selloù voulouz du - o tont deus kened he yaouankiz - a dremene a-rez stern he lunedoù (…)"""
 
Degemer |  Roll ar barzhonegoù |  Anjela Duval hiziv
  © Anjela Duval - Pep gwir miret strizh evit an holl vroioù