Anjela Duval  
C’hoarioù Olumpek

C’hoarioù Olumpek

 

Brud. Fotoioù. Medalennoù.

            Ha divhar torret

            Hag ufernioù divantibulet

            Ha poan-spered. Ha daeroù.

            Evit petra ? Lorc’hajoù ?

Redek. Krapat. Lammat.

            Ruzata war an Erc’h :

            Nag a nerzh foranet !

            Evit plijadur arvestourien

Ledanoc’h o genoù eget o skiant.

            Er c’heit-se. Pet ha pet peizant kozh

            Bet mat da redek

            Bet mat da lammat

            Bet mat da grapat

            — Kuit a vedalennoù, na fotoioù —

            Pet o dije ezhomm hiziv

            A graperien da sevel er gwez

            Da droc’hañ dezho danvez tan ?

Ha ne gavfent ket ur c’hristen !

Lod a zo o redek war-lerc’h medalennoù

Lod o tigeriñ o genoù dirak ar skramm

            A ! Marzh ar C’hoarioù Olumpek !…

 

24 a viz C’hwevrer 1980

 

Loened ar feurm.
 
Degemer |  Roll ar barzhonegoù |  Anjela Duval hiziv
  © Anjela Duval - Pep gwir miret strizh evit an holl vroioù