Anjela Duval  
Evel-se ’mań Er bed-mań

Evel-se ’mań Er bed-mań !

 

                        Bez’ zo tud dilabour

                        Hag a venn bout ac’hubet

                        Bez’ zo tud o klask labour

                        Hag o pediń Doue na gavfent ket.

                        Bez’ zo tud o deus re a labour

                        Tud brevet gant al labour

                        Ha ne gavont den d’o sikour

            Bez’ zo tud n’o deus morse re a labour

                        Ha ne rofent ket un devezh labour

                        Da c’hounit d’un den dilabour.

            Bez’ zo tud o vevań frank gant labour skańv

            Bez’ zo tud o krakvevań gant labour start

Bez’ zo tud o reiń o foan da vagań tud disoursi

Ha tud o vevań disoursi gant poan ar poanier

                        Bez’ zo darn n’o deus morse sav-kein

                        Bez’ zo darn all na blegont morse o c’hein

                                   (La terre est basse !)

            Bez’ zo tud ’vez bemdez ar Sul evito

            Bez’ zo tud ’zo stag sul-ouel-pemdez.

                        Bez’ zo tud ’vez gwisket kran

                        Ha livet o beg ha begoů o bizied

                        Bez’ zo tud ’vez gwisket e truilhoů

                        Roget ha diroget gant an drez hag ar spern

                        Spinac’het ha roufennet o c’hroc’hen

                        Ha rous evel c’hwiled-derv.

            Bez’ zo tud a vev er gwasked

            Ha darn a vev dindan an holl amzer.

            Bez’ zo darn o deus nerzh ha yec’hed

            Bez’ zo darn all dinerzh ha gwiridik

            Bez’ zo tud o deus maner pe gastell

            Bez’ zo tudigoů n’o deus nemet un tiig dirapar

            Bez’ zo tud a oar komz ha kerzhout

            Bez’ zo darn n’o deus na gras na feson

            Evel-se eo lodennet madoů ar Bed-mań

                        Ha hervez darn ned eo ket reizh…

                                    Met eus e lod a skiant

                                   Pep den a vez kontant

            Ha meur a hini a sońj e sekred

            En deus bet muioc’h eget e amezeg.

 

12 a viz Eost 1978

 

Start eo ar foenn da sachań !
 
Degemer |  Roll ar barzhonegoů |  Anjela Duval hiziv
  © Anjela Duval - Pep gwir miret strizh evit an holl vroioů