Rozenn ar stourm

 

25vet deiz-ha-bloaz marv va mamm

                        Fenoz deiz-ha-bloaz da varv

                                   Ar bempvet warn-ugent !

            A, va mammig karet. Karet atav

            Kement en Tu-hont ’vel ’oas en Tu-mañ

                        Dreist ar Bez. Dreist an amzer

                                   Er Peurbad.

Un Eur c’hoazh. Un Eur goude hanternoz

Un Eur c’hoazh e fell din gortoz

            ’N ur bediñ. ’N ur eñvoriñ.

Evel bep bloaz n’hellan repoz.

Da heuilh a ran en da Galvar

Ha me ouzh troad da Groaz.

Semplet em glac’har ken bras.

A, gwelout da boan o steuziñ !

            Da zremm o tont lugernus

                        ’Vel e goursav.

Na ouel ket, eme va c’heniterv

— Hi am harpe — Na ouel ket

                        He marv zo ken kaer…

                        Pemp bloaz warn-ugent !

                        Ur palevarzh kantved…

            Din eo ’vel pa vefe fenoz

                        Emaon amañ en diamzer…

                        Er momed solanel-mañ.

Klasket ’m eus el liorzh

                        Ur rozenn wenn

            War an hevelep bod-roz

A ro bep bloaz e vleuñv

Da lidañ an eur-mañ

                                   Siwazh.

Ar sec’hour hir ha stenn…

            Lazhet eo ar roz gwenn

                                   Padal

Unanig vihan, bihan ha treutik

            Ken aonik, ha ruziet (gant he stourm ?)

Zo chomet e testeni.

                        Eus he Fealded.

                        Dirak da skeudenn

                                   He lakan

                                               Mamm !

E-barzh he frond te ’glevo c’hoazh

            Va c’halon o talmiñ.

 

7 a viz Eost 1976