Anken

 

Follennig, mignonez feal

Disammet ’m eus alies

Va c’halon war da hini

Met fenoz ?… Nann fenoz !

Na ger, na daerenn na tarzh.

Skoulmet eo va c’halon

’Kreiz ur bakadenn orjal drein

Disec’het feunteun va daeroù

Beuzet ’n ur voredenn loskus

Evel avel ar Gouelec’h.

Krommet on dindan ar bec’h

An tan marv el ludu

Va soñjoù ken du. Ken du !

Dianket va steredenn

E viloni ar c’houmoul louet

Va fulor zoken trec’het

Troet en anken, e rec’h

A belec’h e teuy ur frealz ?

A belec’h e teuy ar spi ?

… An Neñv n’am respont mui…

 

26 a viz C’hwevrer 1975