Mil dremm va Bro

 

Ken lies a Vreizh hag a Vreizhad !

Da bep Breizhad e Vreizh !

— E Vreizh godell —

O Breizh va Bro ! a gan pep hini

Eus ar folklorour d’ar Broadelour…

            Ya diniver eo Breizh :

Aner klask ar gont.

Da hemañ Breizh zo an Nevedoù

D’egile eo son ar binioù

Folkloraj skañv ha pardonioù,

D’unan all mein-meur Karnag

Taol-vaen ar Seizh Sant, maen-hir ar Pergad,

Da houmañ ar c’hoefoù dantelezh

hag ar jiletennoù voulouz brodet,

D’eben priaj Kemper

D’an arzour-mañ an arrebeuri kizellet

D’ar c’helenner-mañ : al Levrioù,

ar pladennoù, an arouezioù broadel :

ar Vreizh paper !

D’ar Barzh : an Hentoù don, al lannegi,

            ar brugeier, ar balan alaouret, ar c’hoadoù o kanañ, ar mor o krozal.

D’an arboellour, ar c’hleuzioù rasket,

            al labouradegoù, ar bagoù-pesketa,

            ar c’haol-fleur hag ar sivi.

Ha Breizh an Drouized ?…

Ha Breizh ar Bolitikerien ! ! !

Va Breizh din-me zo unan hag anterin

Va Breizh din-me n’eo ket ur Vreizh godell.

Va Breizh zo Ene, Korf, Spered ha

Kalon va gouenn

Va Breizh zo Mor, Douar, ha Neñv

Va Breizh zo Harozed dec’h

Harozed hiziv

                        Harozed warc’hoazh

Breizh divarvel !…

 

5 a viz Here 1969, Pardon Itron Varia Rozera